Þankar á afmælisdegi...

Jamm í dag á ég afmæli. Tuttugu- og þriggja. Flestum finnst það ótrúlega ómerkilegt afmæli en ég er annarar skoðunar. Það er eitthvað sérstakt við að verða 23, ég get ekki alveg áttað mig á því hvað það er, en það er eitthvað. Kannski af því að það táknar ekki neitt nema það að árin líða og aldurinn færist yfir !! Ekki það að það sé slæmt. Þetta er mikill prímaaldur held ég. En allavega í tilefni dagsins fór ég og eyddi pening. Keypti mér skó (brúna leðurskó !) sem er nú ekki daglegt brauð þannig að ég var nokkuð ánægður með þann árangur. Ég keypti mér líka 4 geisladiska og verður það að segjast að geisladiskakaup geta vel talist sem daglegt brauð. Ég var að telja... og ég er búinn að kaupa mér 24 diska síðan ég kom hingað !! Það eru næstum því 3 diskar á viku. Hmmm... og ég sem á að teljast fátækur námsmaður sem lepur dauðann úr skel á erlendri grund! En hvað getur maður annað gert þegar flestir diskar kosta 5 pund eða 10 pund ? Fyrir forvitna þá er hér listi yfir þá diska sem ég hef keypt í Englandi:

Snow Patrol - Final Straw
Wilco - Being there
Jill Scott - Beautifully Human
Placebo - Without you I'm nothing
Beck - Mutations
Kate Bush - The whole story
Interpol - Antics
Grandaddy - The Sophtware Slump
My Bloody Valentine - Loveless
Ben Folds Five - Ben Folds Five
Belle and Sebastian - If you're feeling sinister
The Smiths - Louder than bombs
Super Furry Animals - Songbook: The singles
The Delgados - The Great Eastern
The Zutons - Who killed the Zutons ?
Modest Mouse - Good news for people who love bad news
Echo and the Bunnymen - Ocean Rain (Remastered)
Sufjan Stevens - Greetings from Michigan the Great Lake State
Mugison - Lonely Mountain
The Tallis Scolars sing Thomas Tallis (þessi af aðeins öðru sauðahúsi en frábær engu að síður)

og svo afmælisdiskarnir:
I am Kloot - Natural History
The Flaming Lips - Yoshimi battles the Pink Robots
Ben Folds - Rockin' the suburbs
Joni Mitchell - Blue

Þar hafiði það...mig grunar að ég fái meira út úr því að skrifa þennan lista en aðrir að lesa hann en það er líka í góðu lagi. Ég á nú einu sinni afmæli :)
Jei, svo fer ég til London á þriðjudaginn að sjá síðustu tónleika The Beta Band á þeirra tónleikaferli því þeir eru víst að leggja upp laupana (því miður). Er ég mjög spenntur en passa mig samt að blogga ekki af mér spjarirnar þegar ég lýsi tónleikunum eftir á eins og gerðist síðast svo eftirminnilega. Ég mun síðan eyða miðvikudeginum í stórborginni og eins og áður njóta gestrisni Ólafar og Helga. Hlakka mikið til.

Kveð að sinni.

Í jafnvægi

Já ég tapaði mér aðeins í síðustu færslu og fór hamförum í dramatískum lýsingum. Eins og lesa má í kommentum varð sumum brugðið og skil ég það. En ég fór sem sagt á bara nokkuð góða tónleika um daginn....hóst, hóst. En nú er ég í jafnvægi, bæði á líkama og sál. Nýkominn úr gymminu, búinn að versla inn og borða tómatasalat og samloku. Nú sit ég við tölvuna, spjalla við vini og vandamenn á MSN, skoða fræðandi og upplífgandi vefsíður. Passa mig samt að verða ekki of ákafur, verð að halda ró minni.....ahummm, ahummm....í fullkomnu jafnvægi. Harmónískt samstarf hugar og líkama. Grænt te, möndlur og engifer. Silki, kamfóra og hör. Pandabirnir, dúfur og náttfiðrildi. Laó Tse, Enya og Friðrik Karlsson.

Living my life, like it's golden...golden !!

Ég lýsi hér með yfir minni óendanlegu aðdáun á hinni guðdómlegu Jill Scott ! Tónleikar þeir er ég fór á í gær hér í Bristol og kölluðust " An evening with Jill Scott" voru hreinlega með þeim allra mögnuðustu sem ég hef upplifað. Þvílíkir hæfileikar ! Þvílík ástríða ! Þvílík einlægni ! Þvílíkur sjarmi ! Þvílík rödd ! Þvílík díva !! Þetta var svo stórkostlegt að ég er ennþá hálf lens. Hún gaf svo mikið og hreif áhorfendur með sér sem út af fyrir sig var afrek því að í fyrstu var stór hluti skarans bara að kjafta úti í horni um allt og ekkert. Sem betur fer náði hún salnum algerlega á vald sitt með sínum skemmtilega húmor, ótrúlega söng og gríðarlegu tilfinningu og innlifun sem hún gaf hverju lagi. Hljómsveitin sem var með í för var einnig frábær og bakraddasöngvararnir ótrúlega hæfileikaríkir. Því miður var enn viss hluti áhorfenda, hið svokallaða "fólk fyrir aftan" sem gat ekki hætt að röfla og var það sérstaklega sárt þegar Jill söng lag um vin sinn sem hún missti í skotbardaga þegar hún var bara unglingur og maður sá tárin streyma niður kinnar hennar. Að fólk skyldi ekki geta hætt að tuða á því augnabliki var ótrúlegur dónaskapur. Ég lýsi hér með frati á lið sem gerir slíkt, hvers vegna er það að borga sig inn á tónleika til þess eins að hanga við barinn og blaðra um g-strengi og lóðalyftingar eða e-ð álíka? Hnuss !!!
En ég skora á fólk að fara á Jill Scott tónleika ef þeim gefst tækifæri til þess. Það er svo þess virði, jafnvel þó þið þekkið ekki hvert einasta lag !

Skensinn brennur !!!!!

Rosalegasta frétt sem ég hef séð á mbl.is í manna minnum !!


Innlent mbl.is 22.11.2004 18:01
Allt tiltækt lið slökkviliðsins í Reykjavík kallað að Grensásvegi 12
Allt tiltækt lið Slökkviliðsins í Reykjavík hefur verið sent að Grensásvegi 12, en rétt fyrir klukkan sex barst tilkynning um að þar væri mikill eldur innandyra.

Eins gott að það var enginn Haxabolla þar inni !

Loksins, loksins !!!

Loksins er þessi endalausa lærdómstörn búin og lítið sem ekkert framundan af verkefnum fyrir jól. Eitt stórt JIBBÝ JEI fyrir því. Brá mér aðeins út á lífið á mánudaginn til að fagna smá stund milli stríða. Endaði það á einum agalegasta klúbbi hér í bæ er heitir Evolution...sem segir allt sem segja þarf....það var eins og að vera á Hverfisbarnum í nítjánda veldi. Tónlistin eftir því...Ace of Base, Backstreet Boys, I´m the Scatman barabbabbabba bí babba barabbabb að ógleymdri Greasesyrpunni sem út af fyrir sig var nóg til að valda varanlegum skaða. Svo var DJinn ætíð að gjamma ofan í lögin til að vekja upp einhverja stemmingu sem var óþarfi, næg var stemmingin hjá liðinu sem þar var. Mig langaði til að kasta flösku í hausinn á honum. Að sjálfsögðu skemmti ég mér konunglega enda ekki annað hægt við slíkar aðstæður og dansaði af fullum krafti við 2 Unlimited. Ég efast samt um að ég láti draga mig þangað aftur...allavega ekki í bráð. Fyrst ég segi þetta verð ég örugglega kominn með VIP kort eftir tvær vikur og dansa ber að ofan við Nelly og Usher lög. Við skulum samt vona að það gerist ekki !

Forgangsröðun

Sit nú og rembist við að skrifa ritgerð sem ég á að skila í dag kl. 17:00. Hún á sem betur fer ekki að vera löng eða aðeins um 1000 orð en ég er samt bara búinn með 150, auk þess sem ritgerðarefnið er afar leiðinlegt (sniðskurður og þrívíddartækni við meðhöndlun steingervinga) og því þarf ég að hafa mig allan við. Ég hefði getað klárað hana í gærkvöldi en ég gat það ekki því ég fór á tónleika (hóst...hóst) með Zero 7. En það var þess virði því tónleikarnir voru afar góðir. Zero 7 eru mjög sterk á sviði miðað við hversu lágstemmd tónlistin er svona venjulega. Einnig græða þau mikið á því að hafa svona marga söngvara sem alltaf eru að svissast á að syngja aðal- og bakraddir. Gerir allt meira lifandi. En nú er það ritgerð...síðasta hindrunin framundan og þá er þessi agalega lærdómstörn (sem staðið hefur óslitin yfir í meira en 2 vikur) búin...allavega í bili.

Snilld ehf

Allir að fá sér Skype. Það er eitt sniðugasta fyrirbæri sem fyrirfinnst, sérstaklega þegar maður er einn í útlöndum. Fyrr í kvöld ræddi ég við foreldra mína og einn heimilisköttinn með þessum frábæra fjarskiptamáta. Ég yrði mjög glaður ef ég fengi óvæntar truflanir yfir lærdómnum á næstu dögum. Ég skora á ykkur, það er hægt að niðurhala því frítt af netinu.

Ég lifi...

...en tæplega þó. Lærdómur hefur öðlast alveg nýja merkingu í lífi mínu svo mikið er hann stundaður hér. Held mér gangandi á súkkulaði, tortillaflögum og sódavatni og þeirri staðreynd að eftir viku verður það versta yfirstaðið. Þangað til....kveð að sinni.

Nýjar myndir !!

Setti inn nokkrar nýjar myndir ( Sjá Myndasíðan hér til hægri) sem ég reyndar tók ekki sjálfur (enda óvenju fáar myndir af mér :P ). Myndirnar eru úr vettvangsferðum sem farnar voru síðustu helgi, til Cardiff á náttúrugripasafnið og tvær feltferðir þar sem skoðuð voru setlög og leitað að steingervingum. Farið var til Portishead (líklega kom bandið þaðan !!...það er allavega frá Bristol) og Avon Gorge sem er faktískt séð í Bristol og þar er mjög fallegt. Einnig eru nokkrar myndir frá kosningavökunni sem var haldin hér á Deans Court og skiljanlega aðallega sótt af Ameríkönum (Allir demókratar og því allir mjög þunglyndir þessa daganna...."I guess I´ll have to stay in Europe the next four years, then..."). Á þessum myndum má sjá hluta af því fólki sem ég umgengst hvað mest svona ef einhver skyldi vera að óttast það að ég eyddi öllum stundum einn inni í herbergi og væri ekki búinn að kynnast neinum.

P.S. Bú á Bush !

Já ljótt er það.... :(

Það lítur út fyrir að Bush bölvaður hafi unnið kosningarnar í nótt. #$%#$&#&#/#$/#$&#$& !!!!!!
Hef ekki mikla trú á að úrslitin frá ÓHÆÓ muni vera Kerry í vil og þeir tefja bara dæmið með því að bíða í 10 daga eftir að telja aukaatkvæðin.
Heimsbyggðin grætur !
Jæja ég þarf að skrifa ritgerð sem ég er að renna á rassinn með sökum skorts á einbeitingu og aga.